Snart klart for Årebrot som bygdenamn
Det går mot at Årebrot vert godkjent som bygdenamn for strekningen frå Årebrotsodden til grensa mellom Kinn og Bremanger ved Husefest. Skjermdumpane er frå Norgeskart.
Årsmøte i Botnane og Årebrot grendalag tok i mars i år opp spørsmålet om å endre namn på kaia frå Villevik til Årebrot kai. Og å få opp eit skilt i Myklebustkrysset med det namnet. Dette vart teke opp med Kinn kommune, som sende saka på høyring til Språkrådet. Rådet oppdaga då at Årebrot ikkje var godkjent som bygdenamn, eller som eit samlenamn for strekninga frå Årebrotsodden til Bremanger grensen. Difor kunne ikkje kaia få namnet Årebrot, meinte dei. Det kom fleire andre forslag som namn på kaia med Årebrotskaia som eitt av dei.
I styret i grendalaget var det klart fleirtal for å halde på Årebrot også som namn på kaia og vi tok opp spørsmålet om å få godkjent Årebrot som bygdenamn. Språkrådet har no ikkje innvendingar til det og skriv i eit brev at det er Kinn kommune som avgjer. Saka kjem truleg opp i oppvekst-og kulturutvalet i Kinn rett etter valet den 8. september. Etter at det eventuelt er vedteke at Årebrot vert samlenamn/bygdenamn for strekninga frå Årebrotsodden til grensa til Bremanger kommune ved Husefest, vil spørsmålet om å endre namn på kaia teke opp att. Når det er gjort vil grendalaget søkje om å få opp skilt i Myklebustkrysset der Frøysjøvegen møter Magnhildskarvegen/Gulevegen. Heile brevet frå Språkrådet kan ein lese med å trykke på lenkja under.
Av Åsmund Berthelsen