,

Stort årsmøte og fleire tiltak

Både små og store med på årsmøte i grendalaget.

Årsmeldinga som vart godkjent på årsmøte viste at grendalaget hadde kring 20 ulike arrangement og aktivitetar gjennom heile 2025. Planane for 2026 viser at det vert lagt opp til noko liknande dette året. I tillegg til arrangement har det vore jobba med fleire viktige tiltak og saker. Rekneskapen som vart godkjent på årsmøte syner eit årsresultat på nesten 190.000 kr og grendalaget har bra med pengar på bok. Men vi har også planar om å bruke pengar både på  arrangement og tiltak i 2026.

 Grendalaget har to grendahusa  som det kostar å drifte, reparere og vedlikehalde. I Botnane er det alt installert vassrenseanlegg og kjøpt inn to nye vindauge til kjellaren. På Årebrot grendahus vil ein bytte til ståande kledning og skifte ein vegg om gongen. I Botnane vil vi lage ein skikkeleg port inn til grendahuset, og på Årebrot vil dei to brakkene nord og sør for grendahuset verte teke ned. Når det er gjort,  vil ein ordne til uteområda og kan hende lage til eit lite nærmiljøanlegg.

Laget er i gang med å planlegge ein liten parkeringsplass i Breivika slik at dei som vil gå stien opp til der radiostasjonen Roska låg har ein plass å setje bilane. På parkeringsplassen vert det informasjon om radiostasjonen  og hendingane der under andre verdskrigen. Det same vil laget gjere i Botnane om hytta i Nøre Dalen der motstandsfolk gøymde seg i mot slutten av andre verdskrigen.

Grendalaget har alt vedteke å arrangere to konsertar. Silisium Vokal kjem til Botnane alt i april, medan Line Dybedal kjem til Årebrot i slutten av september. Det vert også lagt opp til konsert ved opninga av bygdehelga som skal vere 10.-12.juli.

På to av søndagskafeane har laget alt planlagt å ha innslag. I oktober står geologi og Ålfotmassivet på programmet med professor Atle Nesje som foredragshaldar. I november er det Magnus Helge Torvanger og Reidar Brandsberg, frå Flora Historielag som kjem. Torvanger skriv bok om «kystagentane Atle Svardal og Dagfinn Ulriksen, medhjelparane og hjelparane deira», der også motstandsarbeidet Botnane-Årebrot vert omtalt. 

På arbeidsplanen står også kurs i å filetere fisk og partere hjort.

 Når det gjeld saker er det Frøysjøvegen som står øvst på lista. Der vil grendalaget arbeide for å få utbetre det faste dekket på strekningen som står att, frå Sagebø til Botnane. Laget vil særleg ta opp og få utbetra den svært uoversiktlege svingen på Myklebust og få opp autovern inst i Vindspollen. På nytt vil grendalaget ta opp å få fastsett fartsgrensa til 60 km i timen gjennom Botnane og nokre strekningar sørover til Villevika. Villevik kai vil grendalaget endre til Årebrot kai og få opp skilt i Myklebustkrysset som viser til kaia. Til slutt i arbeidsplanen er det med eit punkt om at laget vil arbeide for å få endra soneinndelinga til Skyss slik at Botnane og Årebrot kjem i same prissona!

Åsmund Berthelsen (leiar i styret i grendalaget)

Her er dokument på saker som vart godkjent på årsmøte.

Godkjent Årsmelding 2025

Resultatrapport 2025 BÅG Balanse 2025 BÅG

Vedteken arbeidsplan 5

Vedteke budsjett for 2026

Reglar for utleige i grendahusa

Vedtekne endringar i vedtektene

 

 

 

/av
,

Har nokon forslag til namn?

Kinn kommune har i brev til grendalaget spurt om det er forslag til namn på to eigedomar på Årebrot.

  1. Det gjeld Gbnr 10/29 som er ein fritidsbustad utan vegtilkomst. Den er markert med raud ring på kartet. Namnetenesta i Kinn foreslår Årebrotsvågen. Men dei tek sjølvsagt mot andre forslag.
  2. Det gjeld Gbnr 10/26. Det er også ein fritidseigedom utan vegtilkomst i Årebrotsvågen. Namnetenesta i Kinn foreslår Båsen som namn. Men dei tek sjølvsagt mot andre forslag.

Har de forslag til namn på dei to stadene så send dei til grendalaget på e-post til asmund.berthelsen@icloud.com

innan torsdag 11.september. Så sender vi det vidare til Kinn kommune innan 15.september.

Kinn kommune skriv at namneforslaga skal ha historisk forankring i tråd med god namneskikk og bør vere grunngjevne. Namneforslaga bør ikkje forvekslast med allereie vedtekne namn, og skal godkjennast av Språkrådet før handsaming i Oppvekst- og Kulturutvalet som fattar vedtak etter eit delegasjonsreglement.

 

 

Skjermdump frå norgeskart.no

 

Skjermdump frå norgeskart.no

/av

Kjem til Botnane 5.oktober!

Boka “Team Berlin” er i trykken og forfattaren Roger Sevrin Bruland håpar på griseflaks slik at ho er ferdig til søndagskafeen i Botnane 5. oktober, kl. 16.00. Men uansett kan folk førehandsbestille boka.
Fyrst kom pandemien, deretter krigen. I boka “Team Berlin” tek Roger Sevrin Bruland oss tett på store kriser i vår tid, sett gjennom augo til ein NRK-korrespondent som stod midt i dramatikken. Frå overfylte sjukehus i Nord-Italia til frontlinjene i Ukraina skildrar han med skarp penn og levande detaljar korleis historia kom nærmare på enn nokon gong.
På søndagskafeen i Botnane 5. oktober vil Bruland fortelje om historiene i boka og korleis det var å stå midt i dei. Han vil lese utdrag frå boka og vise bilete frå reportasjereiser, og reflektere over kva krisene i Europa har lært oss om samfunn, politikk og menneskeleg motstandskraft.
Etter føredraget vert det høve til å stille spørsmål og kjøpe signert bøker, om boka rekk å bli ferdig til 5. oktober. Elles kan ein førehandsbestille ho på www.teamberlin.no
/av

Takk til fylkeskommunen

Vestland fylkeskommune har kosta 12-13 kilometer med ny asfalt, med kvite striper, på Frøysjøvegen, frå kaia på Villevika til Håjen i Botnane. På vegne av folk som bur og ferdast langs vegen takkar Botnane og Årebrot grendalag for det!
Vegen vart heilt nedkøyrd då det vart transportert mykje steinmasse frå steinbrotet i Seljestokken til Guleslettane. No er det vegen gjennom Botnane som treng vøling. Å ferdast på Frøysjøvegen gjev mykje flott utsyn, om du går, syklar eller køyrer bil. Det er ein flott sykkeltur frå Villevika og nordover.
/av
, ,

Årebrot eller Årebrotet? Årebrot kai eller Årebrotskaia?

Skal båtane i framtida legg til ved Årebrot kai eller Årebrotskaia?

Styret i grendalaget skal ta stilling til om vi skal søkje om å få registrert Årebrot eller Årebrotet som samlenamn/bygdenamn for området mellom Årebrot lykt og Husefest. Styret skal også ta stilling til om vi skal søkje om namnebyte på kaia, frå Villevika til Årebrot kai eller Årebrotskaia. Send meininga di med grunngjeving til leiaren i grendalaget, Åsmund Berthelsen: asmund.berthelsen@icloud.som.

Og kom gjerne på søndagskafeen 2.februar kl.16.00. Så tek vi ein prat om det!

Grendalaget vedtok på årsmøte i fjor å foreslå å byte namn på Villevika kai til Årebrot kai. Årsmøte vedtok også å arbeide for å få opp skilt i Myklebustkrysset  (der Frøysjøvegen møter FV 611) der det står Årebrot kai.

Brev vart sendt til Vestland fylkeskommune, Kinn kommune og Bremanger kommune. Fylkeskommunen var dei fyrste som svarte. Svaret var at dei kunne ikkje handsame sak om skilt før Kinn kommune hadde avgjort namnesaka. Når namnet var på plass ville dei ta saka opp att, men viste til at det er Statens vegvesen som vedtek skiltinga ved fylkesvegane.

Kinn kommune sende forslaget til namnebyte  ut på høyring. Det var berre Språkrådet som uttalte seg. Rådet peika på at Årebrot ikkje var registrert som bygdenamn eller «eit samlenamn» som var uttrykket grendalaget brukte i brevet.  Språkrådet skreiv vidare at «Årebrot(et) «er ført opp som eigedomsnamn og som namn på ein haug.» Difor meinte Språkrådet at det måtte gjennomførast namnesak for namnet Årebrot (et) som samlenamn eller primærnamn. Og det måtte i ei slik sak verte avgjort om namnet skulle skrivast med bunden eller ubunden form, altså Årebrot eller Årebrotet.

Språkrådet har foreslått at eit alternativ til Årebrot kai kan vere å bruke eit «fast samansett» namn som Årebrotskaia. Her vert det vist til namneformer andre stader, mellom anna Igland i Bremanger og Iglandskaia.

Grendalaget er utfordra til å kommentere og opplyse saka.

Som leiar i grendalaget har eg snakka litt med Fridtjov Urdal. Få kjenner historia til bygda betre enn han. Fridtjov meiner at Årebrot er nytta som bygdenamn mellom folk lenge. Han viser til at dei to skulane i bygda, den eine ferdig 1902 og den andre ferdig i 1985 båe heitte Årebrot skule. Og no har vi Årebrot grendahus. Vi har også Botnane og Årebrot grendalag. Årebrot er då bygdenamnet eller samlenamnet for  området mellom Årebrot lykt (altså ikkje Årebrotet lykt) og til kommunegrensa til Bremanger kommune ved Husefest.

Fyrste spørsmålet er om vi skal søkje om å få registrert Årebrot som bygdenamn/samlenamn? Det reknar eg med vi svarar ja på. Det andre spørsmålet er om vi samstundes skal søkje om å endre namn på kaia til Årebrot kai eller Årebrotskaia? Det veit eg det er litt ulike meiningar om. Så det vil vi gjerne ha synspunkt frå fleire på, gjerne med ei grunngjeving for det eine og det andre. Send det til asmund.berthelsen@icloud.com

Det er Kinn kommune som skal ta stilling til søknadane om bygdenamn/samlenamn og namnebyte på kaia.

Og kom gjerne på søndagskafeen i Botnane på søndag den 2.februar, så tek vi ein prat om det!

28.januar 2025

Åsmund Berthelsen

Leiar i styret i Botnane og Årebrot grendalag

Kaiskuret er nyleg fiksa skikkeleg opp. Spørsmålet er om kaiskuret skal stå ved Årebrot kai eller Årebrotskaia?

/av

Sakspapir til årsmøte laurdag 16.mars 2024

Til årsmøte i Botnane og Årebrot grendalag laurdag den 16.mars kl. 15.00 i Botnane grendahus

Då ynskjer eg vel møtt til årsmøte komande laurdag den 16.mars. Her er sakspapir til møte Alt er framlegg frå styreleiar då det ikkje har vore mogleg å samle styret til møte for handsaming av sakene.

Send gjerne spørsmål eller kommentarar på førehand til asmund.berthelsen@icloud.com

Håpar mange har høve til å kome på årsmøte der vi har litt servering.

Beste helsing

Åsmund Berthelsen (leiar i styret)

Sakliste

Framlegg Årsmelding for Botnane og Årebrot grendalag 2023

Resultatrapport 2023 BÅG

Balanse 2023 BÅG

Forslag arbeidsplan 2024

Aktivitetsplan for BÅG 2024

Framlegg budsjett 2024

Forslag fra valnemda -24

Sak 9 Andre saker

 

 

/av

Haustfest på Årebrot 14. oktober

/av

Program for bygdehelga 14.-16.juli 2023

Program for bygdehelga Botnane-Årebrot 14.-16.juli 2023

Fredag 14. juli:

KL.19.00: Swing jazz frå Sørgulen                                                                               

Konsert med Eliise Tuul, Espen Skartun og Kristian Skaar. Dei spelar swing jazz i tradisjon frå Django Reinhardt, i eit musikalsk spenn frå Duke Ellington til Britney Spears. Det vert enkel servering og vertskap er Kari Brun Ågotnes og Asgeir Øvrebotten.

Botnane grendahus, Frøysjøvgen 2964. Bilettpris kr. 100, Vipps 50 14 65 eller i døra. Påmelding til Åsmund Berthelsen, mobil 93 23 70 73. 

Laurdag 15. juli:

Kl. 10.30: Fiskekonkurranse for liten og stor i Nøre dalen
I denne tradisjonelle fiskekonkurransen gjeld det både å få mest fisk, og største og minste fisken. Vetle Aase Øvrebotten er primus motor.

Kl.11.00-15.00: Lunsjkafe i Botnane grendahus
Sal av mat og drikke, bøker og diktkort. Vertskap er Hannele Turunen og Marion Van Eck Ederveen.

Kl.13.00: Omvising i skulptursamlinga etter Aase Botnmark
22 skulpturar i skulestova i Botnane grendahus. Magni Øvrebotten er omvisar.

Kl.13.00: Opplæring i kast og kasteteknikk i diskgolf

Kl.14.00: Opning av og turnering i den nye diskgolfbana i Botnane
Bana ligg i det gamle beiteområdet kring Botnane grendahus. Rune Nordbotten er primus motor.

Søndag 16. juli:
Kl. 11.00: Fottur i Husefestmarka og over til Uradalen
Torleif og Nina Seljestokken er turleiarar. Påmelding til Nina, mob.40 24 48 49

Kl.11.00: Gudsteneste i skulestova, Botnane grendahus
Med sokneprest i Ytre Bremanger, Dag Leirvik. Elisabeth Ruud Nordbotten er kontaktperson.

Kl.15.00: Basar på Årebrot grendahus, Frøysjøvegen 4200
Med sal av mat og lodd, og utlodding. Inntekta går til Botnane og Årebrot grendalag og drifta av grendahusa og andre aktivitetar i bygdene våre.

Anna du kan gjere Botnane – Årebrot: Fleire merka turløyper, Diktarsti og stolpejakt. Sjåwww.stolpejakten.no

 

/av